Philippine Tourism Conference on Climate Change Adaptation, enot na gigibohon sa ciudad nin Legazpi

LEGAZPI – Nakatutok na sa industriya ning turismo an kampanya sa Climate Change Adaptation pakatapos kan serye nin mga aktibidad katakod kan ipigpapaotob na climate change mainstreaming kan satuyang Presidente Benigno S. Aquino III.

Ini sa paagi ninda Secretary Lucile Sering kan Climate Change Commission,  Secretary Ramon Paje kan Department of Environment and Natural Resources (DENR), Secretary Ramon Jimenez kan Department of Tourism, asin ni Secretary Herminio ‘Sonny’ Coloma, Presidential Communication Operation Office, pamayo kan public awareness monitoring kan mga LGU asin mga ahensiya pati na mga NGO/stakeholder sa pagpautob kan mga programa paitin mga proyekto sa Climate Change susog man sa mga prioridad na polisiya ni PNOY.

An Local Climate Change Adaptation for Development Inc., o (LCCAD), sarong Non-Government Organization o (NGO), na rekonosido kan Palasyo Malacanang,  na kompwesto nin experiensiyadong mga Community Adaptation Practitioners (CAPs) sa Pilipinas, pinangengenotan ni Nong Rangasa, an pangenot na katabang kan gobiyerno sa gigibohon na kainot-enoting Philippine Tourism Conference on Climate Change Adaptation o (PTCCCA), sa Agusto 23-25 kan taon na ini, sa Oriental Hotel and Resort sa siyodad nin Legazpi.

Ini simbag sa pangapudan kan United Nations asin ni Presidente Aquino na mabawasan an kadipisilan sa buhay, na obheto kan Millenium Development Goals o (MDG) asin an marhay naginibohan kan turismo sa local asin pang nasyon na ekonomiya dara kan torismo.

Mag-kikinabang sa PTCCCA an mga komunidad sa sector kan turismo sa manlaen laen na probinsiya, siyudad asin munisipyo sa bilog na nasyon sa tahaw kan Climate Change Adaptation asin Climate Change Risks Management Initatives.

Sa pagpahiling nin mahiwas asin pusog na suporta sa LCCAD, ipinaluwas an memorandum circular 2012-108, ni DILG Secretary Jesse Robredo kan Hunyo 18, asin pigsugo kaini an mga local na opisyal sa gabos na probinsiya, siyudad patin munisipiyo kan Pilipinas na mag atendir asin magpadara nin mga personahe sa gigibuhon na tulong aldaw na pagtiripon. An PTCCCA sarong ka-kambal na okasyon kan ‘Ibalong Festival’ kan Siyudad nin Legazpi sa pangenot ni City Mayor Carmen Geraldine Barrameda-Rosal.

Binilog kan LCCAD asin mga co-convenors an nasabing proyekto bilang suporta sa pangapudan ni PNOY na pakusugon an Public-Private Partnership initiatives (PPPIs) na pigbubusol sa national asin local level tanganing tawan nin mahigot na partisipasyon an mga pribadong sector na makatabang sa mga kamawotan kan gobiyerno pasiring sa kauswagan panturismo.

Particular na pigsusugo na mag atendir an mga pamayo kan tourism asin environment committee sa kada konseho, kasabay an mga tourism officer, planning officer, disaster officer, agriculture officer, environment officer asin iba pang technical staff kan kada probinsiya, siyodad asin munisipyo.

Nagpahayag si Robredo nin dakulang suporta sa PTCCCA na pinapangenotan kan Climate Change Commission, Department of Tourism asin kan Local Climate Change Adaptation for Development o (LCCAD), na pinapangenotan ni LCCAD Chairman/President Nong C. Rangasa. Si Rangasa iyo man an Conference Director sa nasambit na okasyon.

Segun kay LCCAD president/chairman, Nong Rangasa asin kay DOT regional Director Nini Ong-Ravanilla, ang pagpakusog sa Climate Change Adaptation sa ‘Eco-Cultural Tourism Sector, matao nin permanenteng trabaho sa mga tao, asin buwis sa kaban kan gobiyerno.

Segun pa kay Rangasa, kaipuhan nang magkaigwa man an pilipinas magin an lokalidad, nin imbentaryo kan ‘cultural property, heritage asin impact assessment’ para lalong mapatunayan asin makadara nin turista hale sa iba-ibang probinsiya asin ibang nasyon. Ini sarong bagay na dai pa nagigibo sain man na parte kan Pilipinas.

Tampok sa nasabing pagtiripon an mga lakdang sa adaptasyon asin ligtas na pagsabat sa mga kalamidad base sa experiensiya kan Albay sa pamamayo ni Gov. Joey Sarte Salceda, an kaenot enoteng Global Champion for Climate Change Adaptation asin Disaster Risk Reduction sa pagmidbid saiya kan United Nations Systems.

Si Salceda man an nagbubusol kan ALMASOR o an Albay, Masbate Sorsogon Tourism

Pangenot na mga tagapagtaram sa okasyon an mga siyentipiko, mga experto, edukador, asin mga midbid na opissyales pang turismo sa nasyon. Imbitado man sa nasambit na okasyon an mga senador patinman an mga cabinet secretaries.

Ini papartisiparan man kan mga delegado hale sa man-iba ibang institusyon, sector nin negosyo sa turismo asin pangkalibutan.

An sinabing okasyon binilog kan LCCAD, DOT, Climate  Change Commission, Senate Committee on Climate Change, DENR, Office of Presidential Adviser for Environmental Protection (PAEP), Ako Bikol Party List, asin kan Philippine Information Agency (PIA), gobiyerno probinsiyal kan Albay, Legazpi City Government, UP Los Baños, Senator Loren Legarda.